Таиланд ва Камбоджа чегара жангларини тўхтатди, сулҳга эришилди
Таиланд ва Камбоджа чегарадаги тўқнашувларни иккинчи сулҳ битими билан тўхтатди. Сулҳ бугун кучга кирганидан сўнг икки соат ўтиб ҳам сақланмоқда ва ҳозирча янги отишмалар ёки тўқнашувлар ҳақида хабар йўқ.
Битим Таиланд ва Камбоджа мудофаа вазирлари томонидан имзоланган бўлиб, 20 кун давом этган жанглар натижасида камида 101 киши ҳалок бўлган ва ярим миллиондан ортиқ одамлар эвакуация қилинган эди. Тўқнашувлар учувчисиз самолётлар, ракета ўқ-дорилари ва артиллерия зарбалари билан кечган.
Сулҳ битимини АСEАН кузатувчи гуруҳи назорат қилади, шунингдек ҳарбий ва сиёсий даражада вазирлар ва қўшин бошлиқлари ўртасида тўғридан-тўғри алоқа ўрнатилади. Битимда ҳар икки томон аҳоли ва тинч фуқароларга қарши куч ишлатмаслик келишилган.
Шу билан бирга, сулҳ чегара чизиқларини белгилаш ишларига таъсир қилмайди. Таиланд июль ойидаги тўқнашувларда ҳибсга олинган 18 камбоджалик аскарни сулҳ 72 соат давомида сақланса қайтаришни ваъда қилган. Мамлакатлар келгусида тинчлик ва хавфсизликни таъминлаш учун мавжуд механизмлардан фойдаланишни давом эттиради.