Тошкентда пиротехника портлаши боланинг қўлини олиб кетди
Тошкент шаҳар ИИББ матбуот хизмати навбатдаги огоҳлантирувчи ахборот билан чиқди. Бу ҳақда upl.uz хабар беради.
Қайд этилишича, яқинда Республика шошилинч тиббий ёрдам илмий марказига Янгиҳаёт туманида яшовчи бола оғир жароҳат билан олиб келинган. Дастлабки текширувларда пиротехника буюми унинг қўлида портлаб кетгани аниқланган.
Портлаш оқибатида боланинг танасининг турли жойларида куйишлар кузатилган, шунингдек жароҳатланган қўлдаги бир нечта бармоқ узилиб кетган. Энг оғир томони — қўл панжасидаги барча суяклар майдаланиб, тўқималар жиддий шикастлангани сабаб шифокорлар панжани ампутация қилишга мажбур бўлган.
ИИББ ота-оналарни болаларни пиротехникадан асрашга чақирди. Таъкидланишича, Ўзбекистонга кириб келаётган пиротехника асосан контрабанда йўллари орқали олиб кирилади ва бу сифатсиз, инсон саломатлиги ҳамда ҳаёти учун хавфли маҳсулотлар кўпайишига сабаб бўлмоқда.