Қашқадарё технологик транспорт акциялари сезиларли ошди

19–26 декабр кунлари Республика фонд биржаси «Тошкент»да юқори ликвидли акцияларнинг аксарияти ўсиш кўрсатди. Натижада UCI фонд индекси 2,4% га кўтарилди. Бу ҳақда kursiv.uz хабар беради.

Ҳафта давомида энг катта ўсиш «Қашқадарё технологик транспорт» акцияларида қайд этилиб, уларнинг қиймати 14,81% га ошди. Шунингдек, «Uzmetkombinat» (+7,04%) ва «Uzbekneftgaz» (+5,52%) қимматлашди.

Шу билан бирга, ҳафтанинг энг йирик пасайиши «UzRTSB» акцияларида кузатилди — котировкалар 12,68% га тушди. Бундан ташқари, «Garant bank» (-7,62%) ва «Uzbekgeofizika» (-4,96%) акциялари ҳам арзонлашди.

«Uzsanoatkurilishbank» ҳамда Uzbekinvest акцияларида эса нарх ўзгариши кузатилмади. Умуман олганда, юқори ликвидли қимматли қоғозларнинг 14 таси ҳафтани ўсиш билан якунлаган бўлса, 2 таси ўзгармади, 13 таси эса манфий динамикани кўрсатди.