Ижтимоий тармоқларда энг кўп ҳақоратланган футболчилар...
Ўтган мавсум Ла Лига футболчилари орасида ижтимоий тармоқларда энг кўп ҳақорат ва нафратли муносабатга дуч келган ўйинчи сифатида «Барселона» вингери Ламин Ямал қайд этилди. Бу ҳақда Испанияда ирқчилик ва ксенофобия ҳолатларини кузатиб борувчи OBERAXE маркази тайёрлаган таҳлилда маълум қилинган.
Ҳисоботга кўра, мониторинг жараёнида жами 33 мингдан ортиқ ҳақоратомуз ва нафрат уйғотувчи постлар аниқланган. Уларнинг тахминан учдан бир қисми ижтимоий тармоқлар томонидан ўчириб ташланган. Аниқланган барча салбий изоҳларнинг 60 фоизи айнан Ямалга қарши йўналтирилгани эътиборга молик.
Рўйхатда иккинчи ўринни «Реал» ҳужумчиси Винисиус Жуниор эгаллади — унга нисбатан барча нафратли постларнинг қарийб 29 фоизи тўғри келади. Шунингдек, Килиан Мбаппе ва Алекс Балде (3 фоиздан), Браҳим Диас ҳамда Иняки Уилямс (2 фоиздан) ҳам энг кўп ҳақоратга учраган футболчилар қаторига киритилган.
Мутахассислар таъкидлашича, нафратли изоҳлар сони энг юқори даражага 2024 йил 27–28 октябрь кунлари ўтказилган «Эл-Класико» учрашуви пайтида чиққан. Бундан ташқари, «Мальорка» — «Барселона», «Атлетико» — «Реал» баҳслари, Испания Суперкубоги ўйинлари ҳамда рамазон ойида айрим футболчиларнинг рўза тутиши билан боғлиқ мавзулар атрофида ҳам салбий фаоллик кескин ошган.
Тадқиқот натижаларига кўра, интернет маконидаги нафратдан энг кўп жабр кўраётганлар — Шимолий Африкадан келган футболчилар (42 фоиз) ва мусулмон ўйинчилар (41 фоиз) ҳисобланади. Бу ҳолат футболда нафақат майдонда, балки ахборот маконида ҳам жиддий муаммолар сақланиб қолаётганини кўрсатади.