Пепнинг аччиқ гапи: «Сити» гол ура олмади, имкониятлар “учди”

АПЛнинг 19-турида «Манчестер Сити» сафарда «Сандерленд» билан 0:0 ҳисобида дуранг ўйнади. Учрашувдан кейин жамоа бош мураббийи Пеп Гвардиола ўйин ҳақидаги фикрларини очиқ айтди — асосий муаммо аниқ: «Сити»да имконият бўлди, аммо фойдаси чиқмади.

Гвардиола таъкидлашича, жамоа ўйин давомида жуда кўп голли вазиятларни яратган, лекин уларни ишга сола олмаган.

«Жуда кўп имкониятларни бой бердик. Гол уришимиз мумкин бўлган вазиятлардан фойдалана олмадик. 1-бўлимда ўзимиз истаган футболни намойиш этишга қийналдик. Умумий қилиб айтганда яхши ўйин бўлди», — деди Гвардиола.

Устознинг айтишича, иккинчи бўлимда «Сити» анча жонланди. Танаффусдан кейин жамоа ғалаба учун охиригача борган, аммо натижа барибир ўзгармаган.

«Танаффусдан сўнг ҳаммаси яхши бўлди, ғалаба қозониш учун йигитлар охиригача курашди. Натижадан бироз ҳафсаламиз пир бўлиши мумкин. лекин уч кундан кейин «Челси»га қарши жуда қийин ўйин кутяпти. Хотиржамликни сақлаб қолишимиз шарт», — деди Гвардиола.

Гвардиола яна бир бор энг оғриқли нуқтани такрорлади: танаффусдан кейин «Сити» ғалабани олиб қўйиши мумкин эди, лекин муҳим эпизодлар бекор кетган.

«Такрор айтаман, танаффусдан сўнг ғалаба қозонишимиз мумкин эди, лекин вазиятларни кўкка совурдик. Савиниода иккита, Доку, Гвардиол, Фоден ва Ҳоландда ҳам гол уриш учун яхши имконият бўлганди», — деди Гвардиола.

Қисқаси, «Сити»нинг ўйини ёмон эмас, аммо самара йўқ. Энди эса вақт ҳам кутиб турмайди — уч кундан кейин «Челси»га қарши оғир синов. Пеп айтганидек, хотиржамлик ва аниқлик асосий калитга айланади.