Тошкент шаҳрида бир килограмм палов тайёрлаш қанчага тушмоқда?

Миллий статистика қўмитаси тақдим этган маълумотларга кўра, 2025 йил декабрь ойида бир килограмм палов тайёрлаш харажатлари ҳудудлар кесимида ҳисоблаб чиқилди. Ҳисоб-китоб натижалари мамлакат ҳудудларида маҳсулотлар нархи турлича эканини кўрсатмоқда.

Жумладан, Қорақалпоғистон Республикасида 1 кг палов тайёрлаш қиймати 97 727 сўмни ташкил этган бўлса, Андижон вилоятида бу кўрсаткич 105 336 сўм, Бухоро вилоятида эса 107 175 сўмга тенг бўлган.

Жиззах вилоятида палов таннархи 109 017 сўм, Қашқадарё вилоятида 111 093 сўм, Навоий вилоятида 109 169 сўм, Наманган вилоятида 108 030 сўм этиб қайд этилган. Самарқанд вилоятида ушбу рақам 112 222 сўм, Сурхондарё вилоятида 111 002 сўм, Сирдарё вилоятида эса 103 696 сўмни ташкил қилган.

Шунингдек, Тошкент вилоятида бир килограмм палов тайёрлаш учун 111 857 сўм, Фарғона вилоятида 114 890 сўм, Хоразм вилоятида 106 527 сўм сарфланиши ҳисоблаб чиқилган. Энг юқори кўрсаткич Тошкент шаҳрига тўғри келиб, у ерда 1 кг палов таннархи 115 491 сўмга етган.

Мутахассислар ҳисоб-китобига кўра, бир килограмм палов тайёрлаш учун қуйидаги маҳсулотлар талаб этилади:

— кунгабоқар ёғи — 0,3 литр;

— пиёз — 300 грамм;

— мол гўшти — 700 грамм;

— сабзи — 1 килограмм;

— гуруч — 1 килограмм;

— нўхат — 100 грамм;

— зира — 10 грамм;

— ош тузи — 20 грамм.

Қайд этилишича, келтирилган рақамлар ҳудудларда тайёр ҳолда сотилаётган палов нархини англатмайди. Ушбу сумма фақат маҳсулотлар қиймати асосида ҳисобланган бўлиб, палов тайёрлаш ва бошқа хизматлар учун ҳақлар бу ерга қўшилмаган.