Ираола Семенё трансфери бўйича ҳали келишув йўқлигини айтди
«Борнмут» бош мураббийи Андони Ираола вингер Антуан Семенёнинг келажаги борасидаги навбатдаги саволга жавоб берди. Бу ҳақда euro-football.ru хабар беради.
25 ёшли футболчи «Манчестер Сити»га ўтишга жуда яқин экани айтилмоқда, бироқ «гилослар» устози таъкидлашича, битим ҳали якунланмаган.
«Ҳали ҳеч нарса имзоланмади. Музокаралар давом этяпти, шов-шувни тушунаман, аммо Антуан ҳозирча бизнинг футболчимиз. Ўйлайманки, у яқинлашиб келаётган икки уй учрашувида – «Арсенал» ва «Тоттенҳем»га қарши ўйинларда майдонга тушиши мумкин, биз шунга умид қиляпмиз. Семенё – ҳақиқий профессионал ва жуда яхши йигит. У жамоага ёрдам беришни хоҳлаётганига ишонаман ва қўлидан келганини қилади», – деди Ираола матбуот анжуманида.
«Борнмут» шанба куни «Арсенал»ни қабул қилади, «Тоттенҳем»га қарши баҳс эса чоршанба кунига белгиланган.