Мадуро қаерда экани бўйича янги маълумотлар тарқалди
2026 йил 3 январ куни (Тошкент вақти билан) АҚШ президенти Доналд Трамп расмий баёнот бериб, Венесуэла етакчиси Николас Мадуронинг асирга олинганини маълум қилди. Йирик халқаро ОАВларга кўра, бу воқеа олдиндан пухта тайёрланган махсус амалиёт натижаси бўлган ва вазифа АҚШ қуруқлик қўшинларининг “Делта” элит бўлинмасига топширилган. Бу ҳақда upl.uz хабар беради.
Мадуро ушланганига оид хабарлар фонида унинг яқин доирасидаги айрим юқори лавозимдагилар ҳалок бўлгани ҳақидаги гап-сўзлар ҳам тарқалди. Дастлабки маълумотларда ҳатто Венесуэла мудофаа вазири америкалик махсус кучлар билан тўқнашувда йўқ қилингани айтилган, бироқ бу хабарлар тез орада шубҳа остига олинди.
Орадан кўп ўтмай, Венесуэла мудофаа вазири омма билан бевосита алоқага чиқиб, тирик эканини ва иш фаолиятини давом эттираётганини билдирди. У Вашингтонга нисбатан кескин оҳангда баёнот бериб, қуролли кучлар тўлиқ сафарбар қилинганини ва узоқ муддатли қаршиликка тайёрлигини таъкидлади.
Ҳозирча минтақадаги вазият ўта таранглигича қолмоқда. Вашингтон Мадуронинг ҳақиқатан ҳам жисмонан қўлга олинганини тасдиқловчи қўшимча далилларни тақдим этмади, Венесуэла томони эса кенг кўламли мудофаа урушига тайёр эканини намойиш қилмоқда.
ОАВлар Мадуронинг АҚШ ҳудудида бўлиши мумкинлигини ёзмоқда, бироқ Венесуэла президенти айнан қаерда сақланаётгани ҳозирча очиқланмади. Хабарларда тилга олинган “Делта” (1st Special Forces Operational Detachment-Delta) бўлинмаси эса 1977 йилда тузилгач, узоқ йиллар расман тан олинмаган, унинг амалдаги оператсиялари ҳануз энг махфий давлат сирларидан бири бўлиб қолмоқда.