Янги The Sims қаҳрамонларининг илк кўриниши сизиб чиқди
The Sims 4 узоқ йиллик қўллаб-қувватлови якунга яқинлашаётгани ҳақидаги гап-сўзлардан сўнг, инсайдерлар сериянинг кейинги ўйини қандай кўриниш олиши мумкинлигидан дарак берувчи тасвирни қўлга киритди. Маълумотларга кўра, янги лойиҳа ҳозирча Project X код номи билан юритилмоқда. Унда тўлиқ очиқ дунё, қаҳрамонлар дизайнини фотореализмга яқинлаштириш ва ҳаёт симулятори имкониятларини сезиларли кенгайтириш ваъда қилинмоқда. Бу ҳақда playground.ru хабар беради.
Sims Community портали аноним хат олган, ичида эса TSX_MATERIAL_SIMS_EXPLORATORY номли файл бўлган. Скриншотда тўртта сим тасвирланган бўлиб, уларнинг услуби The Sims 4 даги ҳозирги стилистикадан анча фарқ қилади. Қаҳрамонлар янада деталли, соч ва кийим текстуралари сифатлироқ кўринади, бироқ Maxis ишларига хос таниш эстетика сақланиб қолган. Расм таглавҳасида эса “Create Beyond Limits” деган шиор ёзилган.
Инсайдерларнинг айтишича, Project X оддий навбатдаги янгиланиш эмас, балки мустақил яккахон лойиҳа. У аввал шов-шув бўлган Project Rene дан ажратиб олингани айтилади (тахминан The Sims 5). Хабарларга кўра, Electronic Arts тажрибани икки йўналишга бўлишга қарор қилган: Project Rene кўпроқ мультиплейер платформа сифатида қолади, Project X эса янги авлод учун сюжетга урғу берилган ўйин бўлади.
Манбалар, шунингдек, 2026 йил The Sims 4 учун йирик қўшимчалар борасида якуний босқич бўлиши мумкинлигини таъкидлайди. Ҳали қироллик ҳаёти мавзусидаги кенгайтма чиқиши кутилмоқда, ундан кейин эса қўллаб-қувватлов асосан техник патчлар ва кичик тўпламлар билан чекланиб қолиши эҳтимол.