Париж суди Брижит Макрон ҳақидаги миш-мишлар учун жазо тайинлади

Париж жиноий суди Франциянинг биринчи хоними Брижит Макронга қарши интернетда олиб борилган таъқиб, ҳақорат ва асоссиз миш-мишлар тарқатиш иши бўйича ҳукм чиқарди. Суд 10 нафар айбланувчини президент рафиқасига нисбатан “ғаразли, камситувчи ва ҳақоратли” иборалар орқали қасддан зарар етказган, деб топди.

Қарорга кўра, судланувчиларнинг аксарияти 4 ойдан 8 ойгача шартли қамоқ жазосини олган. Ишдаги шахслардан бири суд мажлисига келмагани учун 6 ойлик қамоқ жазосига ҳукм қилингани айтилмоқда.

Маҳкумлар орасида реклама агентлиги раҳбари Орелен Пуарсон (8 ой шартли) ва фолбин сифатида танилган Амандин Руа (ярим йиллик жазо) ҳам бор. Прокуратура уларни Брижит Макронга қарши дезинформация кампаниясининг ташаббускорлари сифатида баҳолаган. Шунингдек, суд уларни интернетдаги бошқа фойдаланувчилар билан муомала маданиятини оширишга қаратилган курсларда ўқишга мажбурлагани ҳам қайд этилган.

Гап шундаки, айбланувчилар Брижит Макрон ҳақида “у аслида Жан-Мишел Троне исмли эркак бўлиб туғилган” деган асоссиз фитна назариясини тарқатган. Шу билан бирга, улар Эммануэл ва Брижит ўртасидаги 24 йиллик ёш фарқини омма олдида масхара қилишга уринаётгани таъкидланади.

Материалларда яна бир муҳим эпизод тилга олинади: айни пайтда АҚШда Франция биринчи хоними ҳақидаги шундай миш-мишларни фаол ёйган ўта ўнг қанот фаоли Кендис Оуэнсга қарши даъво ҳам кўриб чиқилаётгани айтилган. Бу даъво ишини Эммануэл Макрон қўзғатгани қайд этилади.