Трампнинг Венесуэла нефтига доир баёноти ортидан АҚШ нефть компаниялари акциялари қимматлашди

Душанба куни АҚШдаги йирик нефть компаниялари акциялари кўтарилди. Бунга президент Дональд Трампнинг Венесуэланинг нефть захираларига эҳтимолий кириш имконияти ҳақида айтган гаплари фон бўлди, деб ёзади Reuters. Бу ҳақда kursiv.uz хабар беради.

Трамп Венесуэла президенти қўлга олинган тақдирда, АҚШ мамлакатдаги нефть объектлари устидан назорат ўрнатиши мумкинлигини билдирган. Унинг таъкидлашича, америкалик компаниялар сармоя киритиб, инфратузилмани тиклаши ва кейинчалик даромад ола бошлаши мумкин.

Венесуэла дунёдаги энг катта нефть захираларига эга бўлса-да, сўнгги йилларда нотўғри бошқарув, инвестиция етишмаслиги ва санкциялар сабабли қазиб олиш кескин пасайган.

Премаркет савдоларида Венесуэлада фаолият юритаётган ягона йирик АҚШ компанияси бўлган Chevron акциялари 7% га ошди. Шунингдек, Phillips 66, Marathon Petroleum, Valero Energy ва PBF Energy қимматли қоғозлари ҳам 5–16% оралиғида кўтарилди.

Умуман олганда, нефть нархлари деярли ўзгармади. Бунга жаҳон бозорида таклиф юқорилиги таъсир қилаётгани, Венесуэладан етказиб бериш бўйича вазият эса ҳануз ноаниқ экани қайд этилди.

Венесуэла нефти оғир турга мансуб бўлиб, олтингугурт миқдори юқори. Бу хусусият уни дизел ва бошқа оғир маҳсулотлар ишлаб чиқариш учун қулай қилади. Бундай хомашёни АҚШнинг Мексика қўлтиғи бўйидаги, айнан шу турдаги нефтьни қайта ишлашга мослаштирилган заводлар осон қабул қила олади.

Reutersга кўра, шароит ўзгарса, Chevron биринчи бўлиб фойда кўриши мумкин бўлган компаниялар қаторида турибди. АҚШ нефтьни қайта ишлаш корхоналари эса “уйга яқин” ҳудуддан оғир нефть ҳажмини кўпайтириш имконига эга бўлиши мумкин.