Луис Энрике Мбаппе кетганидан афсусдалигини яширмади
"ПСЖ" бош мураббийи Луис Энрике Килиан Мбаппе ҳақида фикр билдирди. Француз ҳужумчи испаниялик мутахассис қўл остида 2023/24 йилги мавсумда тўп сурди, шундан сўнг эркин агент сифатида Мадриднинг "Реал" клубига йўл олди. Бу ҳақда euro-football.ru хабар беради.
Энрикенинг айтишича, Мбаппе майдонда ҳам, майдон ташқарисида ҳам ўзига хос характерга эга футболчи: камтар, сокин ва одобли. Мураббий бундай сифатлар юқори даражадаги юлдузларда кам учрашини таъкидлаб, ҳужумчининг айниқса "ПСЖ" учун мураккаб паллада "Реал"га кетгани афсусли эканини қайд этди.
Шу билан бирга, Энрике Мбаппега нисбатан ҳеч қандай эътирози йўқлигини билдирди: футболчи доимо ҳурмат билан муомала қилган, унинг ота-онаси ва укаси ҳам худди шундай муносабатда бўлган. Мураббий Килианинг ишлари жойида бўлишини тилади.
Маълумот учун, Килиан Мбаппе 2017 йилдан бери "ПСЖ" шарафини ҳимоя қилиб келган.