Ўзбекистон божхона қўмитаси чегара постлари ёпилгани ҳақидаги гап-сўзларга изоҳ берди

Ўзбекистондаги чегара постлари фаолияти тўхтатилмагани, улар одатдаги тартибда ишлашда давом этаётгани маълум қилинди. Бу ҳақда Божхона қўмитаси матбуот котиби Ҳусан Тангриев билдирган. Бу ҳақда kursiv.uz хабар беради.

Унинг айтишича, декабр ойида президент Шавкат Мирзиёев томонидан божхона назоратини оптималлаштириш бўйича тажриба лойиҳасини ишга туширишга доир ҳужжат имзоланган. Мазкур тажриба 2026 йил якунига қадар олти чегара постида амалга оширилади ва унда автотранспортни текшириш жараёнининг айрим босқичларини Чегара хизмати бажаради.

Гап «Боботоғ», «Учтурғон», «Пап», «Рават», «Риштон» ва «Бекобод-авто» постлари ҳақида бормоқда. Идорада постлар ёпилиши режалаштирилмаганини, улар аввалги режимда ишлаётганини алоҳида таъкидлаган.

Тажриба доирасида божхона расмийлаштируви талаб этиладиган товарлар аниқланса, чегарачилар Божхона қўмитаси ходимларини чақиради. Шунингдек, паспорт назорати вақтида эҳтимолий қонунбузарликлар бўйича маълумотлар божхона органларига узатилади.

Икки хизмат ўртасида божхона назорати остидаги автотранспортга оид маълумот алмашинуви ҳам йўлга қўйилиши кўзда тутилган. Бундан ташқари, ҳужжатда айрим ҳудудлардаги масофавий электрон декларациялаш бўйича олти пост фаолиятини тўхтатиш белгиланган: у ердаги ходимлар ягона Божхона расмийлаштируви марказига ўтказилади ёки бошқа постларга тақсимланади.