Франкфуртда голлар ёмғири: «Айнтрахт» ва «Боруссия» жанговар дуранг
Германия чемпионатида 16-тур баҳслари старт олди ва биринчи куннинг энг ёрқин тўқнашувларидан бири Франкфуртда бўлиб ўтди. «Айнтрахт» ўз майдонида «Боруссия Д»ни қабул қилди ва том маънодаги спектакл намойиш этилди — 3:3!
Учрашув жуда эрта қизиб кетди: 10-дақиқада «асаларилар» сафидан Байер ҳисобни очиб, меҳмонларни олдинга олиб чиқди. Аммо мезбонлар тезда ўзига келди: 22-дақиқада Узун пеналтидан аниқ зарба бериб, мувозанатни тиклади — 1:1.
Иккинчи бўлимда ўйин янада “портлади”. 68-дақиқада Нмеча «Боруссия»ни яна олдинга олиб чиқди. Лекин бу устунлик ҳам узоқ турмади: 71-дақиқада Эбноуталиб гол уриб, таблода яна тенгликни ёқди — 2:2.
Энг драматик лаҳзалар эса ҳакам қўшиб берган дақиқаларда бошланди. 90+2-дақиқада Доуд «Айнтрахт»ни ғалабага яқинлаштириб қўйгандек туюлди. Бироқ «Боруссия» охиригача курашди: 90+6-дақиқада Чуквуэмека жавоб голини уриб, Франкфуртдаги кечага “нуқта” қўйди — 3:3. Қисқаси, қўшиб берилган 6 дақиқа ичида иккита гол — томошабинларга “бонус” бўлди!
Натижада «Боруссия Д» 33 очко билан 2-ўринда қолди. «Айнтрахт» эса 26 очко тўплаб, 7-поғонага кўтарилди. Бу дуранг икки жамоа учун ҳам турли ҳиссиёт: бири учун — ютқазиб қўймаслик, иккинчиси учун — ғалабани қўлдан чиқариб юборганлик.
Бундеслига. 16-тур
Айнтрахт – Боруссия Д 3:3
Голлар: Узун 22 (пен.), Эбноуталиб 71, Доуд 90+2 – Байер 10, Нмеча 68, Чуквуэмека 90+6