Полина Кудерметова Canberra Challenger турнирида кумуш медални қўлга киритди
Ўзбекистонлик теннисчи Полина Кудерметова Canberra Challenger турнирини иккинчи ўрин билан якунлади. Ҳал қилувчи учрашувда у тайванлик Жоанна Гарландга 6:4, 6:2 ҳисобида имкониятни бой берди, дея хабар бермоқда “UzA”.
Мусобақа натижаларга кўра, Кудерметова 19,7 минг доллар мукофот пули ишлаб олди. Чемпион бўлган рақибаси эса 33,6 минг доллардан ортиқ маблағга эга чиқди. WTA рейтинги учун Кудерметовага 81 очко, Гарландга эса 125 очко берилди.
Полина Кудерметова ўтган йил охиридан буён Ўзбекистон шарафини ҳимоя қилиб келмоқда. Бунгача у Россия номидан кортга тушган. Ўзбекистон терма жамоасига ўтган пайтда теннисчи WTA рейтингида 104-ўринда қайд этилганди.
Спортчининг мураббийи — таниқли россиялик теннисчи Динара Сафина. У аввалроқ 2024 йилги Олимпиадада жуфтлик баҳсларида кумуш медал олган Диана Шнайдер билан ҳам ишлаган.