Роналду гол урди, «Ал-Наср» кетма-кет учинчи марта ютқазди

Душанба куни яхши формага кириб олган «Ал-Ҳилол» ўз майдонида яқиндагина пешқадам бўлиб турган «Ал-Наср»ни қабул қилди. Бу ҳақда euro-football.ru хабар беради.

Учрашув бошида Кингсли Коман ўнг қанотдан ёриб кириб, узоқ бурчакка йўллаган зарбаси билан хавфли вазият яратди, бироқ тўп дарвозани бироз четлаб ўтди. Кейинроқ узатмалар етиб келмаётганидан норози бўлган Криштиану Роналду масофадан чап пастки бурчакка зарба берди, дарвозабон эса тўпни бурчак зарбасига чиқариб юборди. 42-дақиқада Жоау Фелиш олдинга пас ташлади, Коман ўнгдан чапга оширди ва Роналду оёғи билан маҳоратли тарзда тўпни тўрга жойлади — 0:1.

57-дақиқада «Ал-Ҳилол» пенальтидан ҳисобни тенглаштирди: Салем ал-Давсари тўпни чап бурчакка аниқ йўллади, дарвозабон эса йўналишни топа олмади — 1:1. Орадан кўп ўтмай меҳмонлар посбони Наваф ал-Акиди гол эпизодидан кейин Рубен Невешга нисбатан кераксиз ҳаракати учун қизил карточка олди ва «Ал-Наср» майдонда бир киши кам қолди.

81-дақиқада бурчак зарбасидан кейинги давомий ҳужум якунида тўп яна Невеш турган ҳудудга қайтди. Португалиялик ярим ҳимоячи ўйиндан узатма берди, Мохамед Канно эса оёғини қўйиб, тўпни дарвозага буриб юборди — 2:1. 90-дақиқада мезбонлар яна пенальти тепди: бу сафар Невеш чап бурчакни нишонга олди, дарвозабон эса бошқа томонга сакради — 3:1.

Шу ғалабадан кейин «Ал-Ҳилол» турнир жадвалида 7 очколик фарқ билан пешқадамлигини мустаҳкамлади. Роналду жамоаси эса иккинчи ўринни бўлишиб турган бўлса-да, кетма-кет учинчи мағлубиятини қабул қилди.