Telegram 2025 йилда 44 миллиондан ортиқ канал ва гуруҳни блоклади
Telegram маъмурияти 2025 йил давомида платформа қоидаларини бузган 44,085 миллион канал ва гуруҳни блоклаган. Бу кўрсаткич 2024 йил якуний натижасидан қарийб 2,7 баравар юқори. Бу ҳақда podrobno.uz хабар беради.
Энг катта тозалаш ишлари 2025 йилнинг IV чорагига тўғри келиб, бу даврда 17,416 миллиондан ортиқ ресурс ёпилган. Бу эса 2024 йил давомида блокланганлар сонидан ҳам кўпроқ.
Ўчирилган ҳамжамиятлар орасида болаларга нисбатан жинсий зўравонлик материаллари тарқатилган 950 мингдан зиёд гуруҳ (28% ўсиш), шунингдек террорчилик тарғиботига алоқадор қарийб 234 минг ҳамжамият (66,6% ўсиш) бор.
Суткалик блоклашлар статистикаси ҳам эътиборни тортади: 2026 йил 1 январ куни Telegram деярли 543 минг ҳамжамиятни ўчирган. Бу 2023 йил декабридан бери бир суткада олиб ташланган ресурслар сони ярим миллиондан ошган учинчи ҳолат бўлди. Аввалги икки шундай кескин кўрсаткич 2024 йил ноябрида қайд этилган.
Рақамлар ўсиши платформада қоидалар ижросини глобал даражада кучайтириш билан изоҳланмоқда. Telegram зўравонлик, террорчилик тарғиботи ва болалар эксплуатациясига қарши курашишда янги модерация воситаларини фаол жорий этаётгани билдирилган.