Хотинини тўйга юбормай, ертўлага қамаган эркак қамалди
Тошкент шаҳри Яшнобод туманида хотинини тўйга юбормаслик учун ертўлага қамаб қўйган 41 ёшли собиқ ҳарбийга суд ҳукми чиқарилди.
Суд ҳужжатларига кўра, 2025 йил 26 июль куни кечқурун у турмуш ўртоғи Г.С.ни Самарқанддаги қариндошлар тўйига кетмоқчи бўлгани учун зўрлик билан ертўлага тушириб, 1 сутка давомида сув ва озиқ-овқат бермасдан, ғайриқонуний озодликдан маҳрум қилган.
Шунингдек, 2025 йил 31 август куни у банк картаси “блок” бўлганини баҳона қилиб, хотинини қўли ва телефон қувватлагич сими билан дўппослаган. Экспертиза Г.С. танасининг турли жойларида кўкаришлар борлигини тасдиқлаган.
2025 йил 19 декабрь куни бўлиб ўтган судда эркак айбига тўлиқ иқрор бўлган. Суд уни ғайриқонуний озодликдан маҳрум қилиш ва оилавий зўравонлик моддалари билан айбдор деб топиб, 3 йил 1 ой муддатга озодликдан маҳрум қилди. Жазони манзил-колонияда ўташи белгиланди.