Майкл Кэррик: «Юқорига чиқишни истаймиз, қадамма-қадам борамиз»
«Манчестер Юнайтед» бош мураббийи Майкл Кэррик мавсумнинг қолган қисми учун жамоа олдига қўйилган вазифалар ҳақида гапирди. Мутахассиснинг таъкидлашича, клуб раҳбарияти томонидан “қаттиқ белгиланган” талаблар рўйхати берилмаган бўлса-да, жамоанинг ўзида мақсадлар жуда ҳам аниқ.
Кэррик журналистларнинг “раҳбариятдан аниқ кўрсатмалар борми?” деган саволига қисқа ва лўнда жавоб қайтарди:
— Йўқ. Лекин биз турнир жадвалининг юқори қисмига яқинлашишни, ҳатто энг тепада бўлишни хоҳлаймиз. Бу жуда очиқ мақсад. Аммо унга етиб бориш учун босқичма-босқич олдинга юриш керак. Еврокубокларга чиқиш ҳам олдинга ташланган яхши қадам бўлади. Энг муҳими — ҳаракатни тўхтатмаслигимиз шарт, — деди Кэррик.
Яъни, “Юнайтед”да ҳозир режа битта: ўз ўйинини барқарор қилиш, очколарни йиғиш ва ҳар ҳафта ўзини янада яхшироқ кўрсатиш. Чунки катта мақсадлар катта баёнот билан эмас, ҳафтадан-ҳафтага қилинаётган иш билан яқинлашади.
Эслатиб ўтамиз, эртага «Манчестер Юнайтед» ўз майдонида Хосеп Гвардиола бошқараётган «Манчестер Сити»ни қабул қилади. Манчестер дербиси Тошкент вақти билан 17:30 да старт олади. Бу баҳс — Кэррикнинг гаплари амалда ҳам қандай кўриниш олишини кўрсатиб берадиган энг қизиқ синовлардан бири бўлиши кутилмоқда.