Арбелоа «Реал»га Анчелотти услубидаги эркинликни қайтармоқчи
Мадриднинг «Реал» клубида янги бош мураббий Алваро Арбелоа жамоанинг ўйин фалсафасини ўзгартириш ниятида. 12 январ куни лавозимидан бўшатилган Хаби Алонсо таркибдан қатъий тузилмага асосланган футбол ва юқори интенсив прессинг талаб қилган, бироқ бу ёндашув фақат дастлабки даврда самарали чиққан. Бу ҳақда euro-football.ru хабар беради.
Diario AS хабарига кўра, Арбелоа футболчиларга майдонда кўпроқ эркинлик беришни хоҳлайди. Унинг қарашлари Карло Анчелотти тамойилларига яқин: ҳужумчилар тўп билан импровизация қилишига имконият яратиш ва улардан ҳимояга қайтишда аввалгидек кескин талаб қўймаслик.
«Реал» Ла Лиганинг 21-тури доирасида шанба куни сафарда «Вильярреал»га қарши майдонга тушади.