Жикия агенти унинг «Антальяспор»ни тарк этиши ҳақидаги гапларга жавоб берди
«Антальяспор» футболчиси Георгий Жикиянинг агенти Владимир Кузьмичёв россиялик ҳимоячининг келажаги борасида изоҳ берди. Бу ҳақда euro-football.ru хабар беради.
Агентнинг айтишича, Жикиянинг аҳволи яхши ва клуб мураббийлар штаби унга ишонмоқда. Сўнгги ўйинларда у майдонга тушмагани сабаби — микрожароҳат бўлган. Ҳозир эса тўлиқ тикланган ва кейинги учрашувда ўйнаши кутилмоқда.
Аввалроқ ОАВда турк клуби «Спартак»нинг собиқ сардори билан хайрлашмоқчи экани ҳақида хабарлар тарқалган эди.
Жикия жорий мавсум Туркия чемпионатида 12 та баҳсда қатнашиб, 2 та гол урди. Унинг «Антальяспор» билан шартномаси 2027 йилнинг ўрталаригача амал қилади.