Флик «Барселона»даги президент сайлови ҳақида фикр билдирди
«Барселона» клубида президент сайлови 15 март куни бўлиб ўтади. Жамоа бош мураббийи Ханс-Дитер Флик матбуот анжуманида ушбу мавзу юзасидан ўз муносабатини билдирди. Бу ҳақда euro-football.ru хабар беради.
Мураббий сайлов санаси жамоа ўйинига таъсир қилмаслиги бўйича у билан маслаҳатлашилганми, деган саволга бу унинг вазифаси эмаслигини, бироқ жараёндан хабардор бўлганини айтди. Флик президент билан гаплашганини ва сайловни имкони қадар эрта ўтказиш клуб учун ижобий янгилик эканини таъкидлади. Унинг фикрича, футболчилар профессионал ва майдонда максимал натижа кўрсатишга эътибор қаратади.
Фликнинг шахсий омили сайловга қандай таъсир қилиши мумкинлиги сўралганда, у сўнгги бир ярим йилда клубда ижобий ўзгаришлар кўп бўлганини қайд этди. Мураббий сармоя киритилгани, трансферлар пухта танлангани ҳамда академия футболчиларига ўсиши учун имконият берилганини эслатди. Унингча, «Барселона» учун энг муҳим нарса барқарорлик ва кейинги вазиятни вақт кўрсатади.
Овоз бериш масаласида Флик «овоз бериш — сир» эканини айтиб, барибир сайловда қатнашишини тасдиқлади.
Шунингдек, у сайлов жараёнини умумий маънода билишини, айрим номзодлар билан таниш эканини, аммо ҳозир асосий эътибори ўз ишида эканини қўшимча қилди. Фликнинг айтишича, вақт келганда кимга овоз беришини ҳал қилади.