Эронда халқаро интернет чекловлари босқичма-босқич бекор қилинмоқда
Дипломатик манбалар хабарига кўра, Эрон январь ойининг бошидан буён амалда бўлиб келган халқаро интернетга кириш бўйича чекловларни бекор қила бошлади. Қайд этилишича, жараён бир йўла эмас, балки босқичма-босқич амалга оширилмоқда.
Манба таъкидлашича, чекловлар нафақат миллий интернет платформаси доирасида, балки халқаро интернетдан фойдаланиш бўйича ҳам юмшатилмоқда. Хабарда 19 январдан эътиборан халқаро интернетга қўйилган тўсиқлар изчил равишда олиб ташланаётгани айтилади. Шунингдек, Эрон президенти Масуд Пезешкиан тегишли идораларга йўллаган мактубида интернет бозорини фаоллаштириш ва жамоатчиликнинг халқаро интернетга киришини таъминлаш учун чекловларни бекор қилишни талаб қилгани келтирилган.
Аввалроқ, миллий валюта кескин қадрсизлангани ортидан 28 декабрь куни норозилик намойишлари бошланган ва уларнинг камида 46 та шаҳарга тарқалгани ҳақида хабарлар тарқалган эди. 8 январь кечқурун эса мамлакатда интернет ва мобил алоқа ўчирилгани айтилиб, бу вазият кучайган паллада ахборотга киришни кескин чеклаб қўйгани таъкидланган.