Космонавтлар қанча пул топиши аниқланди
Космосга парвоз қилиш — катта масъулият, лекин молиявий рағбат ҳам бор. Bloomberg маълумотларига кўра, россиялик космонавтлар олти ойлик орбитал экспедиция давомида тахминан 5,5 миллион рубль атрофида даромад олади.
Космонавт Сергей Рязанский айтишича, парвоз вақтида кунлик даромад тахминан 400 доллар бўлган. Шу ҳисобда стандарт олти ойлик миссияда бу сумма қарийб 72 минг долларга етади. Бу пуллар космосда махсус шароитда ишлагани учун устама сифатида, асосий маошдан ташқари тўланади.
Россия космонавтларининг ойлик асосий маоши эса биринчи парвоздан кейин (мукофот ва компенсацияларни ҳисобламасдан) тахминан 130–140 минг рубль бўлиши мумкин.
Таққослаш учун, NASA астронавтлари федерал хизматчилар ҳисобланади: улар парвоз пайтида ҳам одатдаги иш ҳақини олишда давом этади, алоҳида “космик” устама берилмайди. Йиллик маоши тахминан 100–160 минг доллар, қўшимча кунлик тўлов эса рамзий — кунига 5 доллар (олти ойда тахминан 1 минг доллар).
Қисқаси, АҚШда маош деярли ўзгармайди, Россияда эса асосий фарқни космосдаги кунлик тўлов ва устамалар қилади.