АҚШнинг Калифорния штатида қуюқ туманда 59 та ўзаро машина тўқнашди

АҚШнинг Калифорния штатидаги йирик автомагистраллардан бири — 99-шосседа қуюқ туман оқибатида катта занжирли ЙТҲ содир бўлди. Ҳодиса 31 январь куни эрталаб, тахминан соат 08:15 атрофида кузатилгани айтилмоқда. Маҳаллий йўл патрули маълумотига кўра, аввал шоссенинг ҳар икки йўналишида алоҳида тўқнашув рўй берган, шундан кейин эса кетма-кет зарбалар давом этиб, умумий ҳисобда 59 та транспорт воситаси аварияга тортилган.

Маълум қилинишича, воқеа 99-шоссе бўйлаб, Бейкерсфилддан қарийб 40 мил шимолда, Туларе округи ҳудудида юз берган. Туман шу қадар қалин бўлганки, кўриш масофаси тахминан 150–200 фут (тахминан 45–60 метр) атрофида қолган. Шу сабаб йўл бир неча соатга икки томонлама ёпилган ва фақат тушдан кейин, тахминан 14:30 ларда ҳаракат тиклангани қайд этилган.

Расмийлар бир неча инсон енгил ва ўртача даражада жароҳат олганини билдирган. Ҳозирда ҳодиса сабаблари, айниқса биринчи тўқнашувларга нима туртки бўлгани юзасидан текширувлар давом этмоқда.

Бу каби оммавий авариялар қиш фаслида тез-тез такрорланадиган “ҳаво тузоғи”ни яна бир бор эслатди: туман, музлама ва кескин ёғингарчилик — айниқса эрталабки пайтда — йўлдаги хатарни бир неча баравар оширади. Масалан, аввалроқ Мичиган штатида ҳам йирик кўламли занжирли ЙТҲлар кузатилгани ҳақида хабарлар чиққан эди.

Йўл патрули эса оддий, лекин ҳаёт сақлаб қоладиган қоидаларни яна бир бор такрорлаяпти: тезликни пасайтириш, олдинги машина билан масофани узайтириш ва паст кўриш шароитида максимал ҳушёр бўлиш.
Қисқаси: туман “шошилма” деган сигнал. Унга “ҳа, ҳозир” деб жавоб бериш — энг ёмон сценарий.