7–8 февралда ҳаво илиқ , аммо туман тушади
“Ўзгидромет” 7–8 февраль кунлари учун об-ҳаво прогнози билан чиқди. Унга кўра, дам олиш кунлари республика бўйлаб асосан ёғингарчиликсиз ўтади. Яъни, ҳафта охирида ҳаво бироз “тин олади”, лекин айрим ҳудудларда туман ва тоғли жойлардаги ҳолат ҳали ҳам эътибор талаб қилади.
Шанба куни фақат Фарғона водийси ҳудудларида вақт-вақти билан ёғингарчилик (ёмғир ёки қор) бўлиши мумкин. Ҳарорат жума куни кундузи 1–6 даража илиқ, шимолда 2–7 даража совуқ бўлса, шанба куни кечаси 2 даража совуқдан 3 даража илиққача бўлади. Кундузи эса ҳаво анча юмшаб, 7–12 даража илиққача кўтарилиши кутилмоқда.
Якшанба куни ҳам асосан ёғингарчиликсиз об-ҳаво сақланади. Ҳарорат кечаси 0–5 даража илиқ, кундузи 10–15 даража илиқ атрофида бўлади. Айрим жойларда туман тушиши мумкин. Шамол 7–12 м/с тезликда эсади, 6 ва 8 февраль кунлари баъзи ҳудудларда 13–18 м/с гача кучайиши эҳтимоли бор.
Тоғли ҳудудларда эса ҳаво “ўз қоидаси” билан: вақт-вақти билан ёғингарчилик (ёмғир, қор) кузатилиши мумкин. Энг муҳими, қор кўчиши хавфи сақланади, шунинг учун тоғ йўлларида эҳтиёт бўлиш тавсия этилади.
Тошкент шаҳрида дам олиш кунлари ёғингарчилик кутилмайди. Шанба куни кечаси ва эрталаб туман тушиши мумкин. Ҳарорат шанба куни кечаси 1 даража совуқдан 1 даража илиққача, кундузи 9–11 даража илиқ бўлади. Якшанба куни кечаси 1–3 даража илиқ, кундузи 13–15 даража илиқни ташкил этади.