Индонезияда 7,22 метрлик питон дунёдаги рекордга расман айланди
Индонезиянинг Сулавеси оролида 2025 йил охирида қўлга туширилган урғочи гигант питон — (Malayopython reticulatus) — дунёдаги энг узун илон сифатида тан олинди. У 2026 йил февраль ойида Гиннеснинг рекордлар китобига киритилди.
Маълум қилинишича, 18 январь куни ўтказилган расмий ўлчовда илоннинг узунлиги 7,22 метр экани қайд этилган. Мутахассислар уни наркоз остида танаси тўлиқ бўшашганда яна 10 фоизча узунроқ — тахминан 7,9 метргача чўзилиши мумкинлигини айтган. Аммо ҳайвон соғлиғига зарар етиши эҳтимоли сабаб бу усул қўлланилмаган.
Ҳозирда улкан питон маҳаллий табиатни муҳофаза қилувчи мутахассис Буди Пурванто қарамоғида сақланмоқда. Ҳужжатлаштириш ва баҳолаш жараёнида Калимантандан келган ёввойи табиат гиди, лицензияли илон тутувчи Диаз Нуграҳа, шунингдек, Балида 20 йилдан бери яшаётган тадқиқотчи ва табиат фотографи Раду Френтиу ҳам иштирок этган. Улар питон ҳақидаги гап-сўзларни эшитиши билан Сулавесига йўл олган ва рекордни тўғри расмийлаштиришни мақсад қилган.
Илон катта брезент қоп билан бирга тортилиши чоғида вазни 96,5 килограмм чиққан. Мутахассислар унинг яқин вақт ичида йирик ўлжа билан озиқланмаганини, акс ҳолда вазни 100 килограммдан ҳам ошиб кетиши мумкинлигини таъкидлаган.
Қизиғи, бу ноодатий судралиб юрувчига “Ибу Барон” деган ном берилган. Манбаларда бу ном “Баронесса” маъносида талқин қилинган.