Роналдунинг қизи билан бирга залда машғулот ўтказгани тасвирланди
Жоржина Родригес ижтимоий тармоқларда Криштиану Роналдунинг навбатдаги машғулотидан лавҳа улашди. Суратда юлдуз ҳужумчи спорт залида гантел кўтариб шуғулланаётгани кўринади. Бу ҳақда euro-football.ru хабар беради.
Кадрда 41 ёшли футболчининг қизларидан бири ҳам ёнида турибди: у ҳам гантел ушлаб олган, бироқ кичик ўлчамдаги пушти рангдагисини. Родригес суратга қисқа изоҳ қолдирди: «Дада».
Аввалроқ Жоржина Роналдуни туғилган куни билан табриклаган пост ҳам эълон қилганди. Қизиғи, бу табрик футболчининг 41 ёшга тўлганидан бир кун ўтиб жойлаштирилган.
Айни пайтда Роналду «Ан-Наср»нинг сўнгги бир нечта учрашувида майдонга тушмади. ОАВда португалиялик футболчи клуб бошқарувидан норози бўлгани сабаб ўйинларни бойкот қилаётгани ҳақида хабарлар тарқалган.