Жезуш Роналдуни навбатдаги ўйин олдидан дам олдирмоқда
“Ан-Наср” бош мураббийи Жорже Жезуш Криштиану Роналду нега яқинлашиб келаётган учрашувда майдонга тушмаслигини изоҳлади. Бу ҳақда euro-football.ru хабар беради.
Ар-Риёд клуби чоршанба куни ОФК Чемпионлар лигаси доирасида “Аркадаг”га қарши ўйнайди. Португалиялик юлдуз ҳужумчи бойкотдан кейин тез орада сафга қайтиши кутилаётганди, бироқ бу галги баҳсда ҳам унинг иштироки бўлмайди.
Жезушнинг айтишича, жамоа зич тақвим сабаб Роналдуни ҳамда асосий таркибдаги бир қатор футболчиларни асраб қолишни маъқул кўрган. Мураббий бу қарорни шанба кунги муҳим ўйин — “Ал-Фатеҳ”га қарши баҳс олдидан қабул қилинганини таъкидлади.
“Al Nassr Zone” келтирган иқтибосда мутахассис Роналдунинг Саудия Арабистонидан ташқарида ўтадиган учрашувларни тез-тез ўтказиб юбориши янгилик эмаслигини ҳам эслатиб ўтган.
Саудия чемпионатидаги “Ал-Фатеҳ” — “Ал-Наср” учрашуви 14-феврал, шанба куни бўлиб ўтади.