Жикия клубини ўзгартириши мумкин: агент сабабини айтди
Россиялик ҳимоячи, ҳозирда «Анталяспор» сафида ўйнаётган Георгий Жикиянинг келажаги борасида унинг агенти Малик Арутюнов фикр билдирди. Бу ҳақда euro-football.ru хабар беради.
Агентнинг айтишича, Жикия маош кечикаётгани туфайли норози ва шу сабаб Россия Премьер-лигаси клубларидан тушаётган вариантларни кўриб чиқмоқда. Арутюнов таъкидлашича, тўловлар ноябрдан бери кечикмоқда, қолган жиҳатларда эса футболчи Туркиядаги шароитлардан мамнун.
32 ёшли ҳимоячи «Анталяспор»га ўтган ёзда қўшилганди. У турк клуби билан икки йиллик шартнома имзолаган.
Жорий мавсум Туркия Суперлигасида Жикия 12 та учрашувда майдонга тушди. Ҳимоячи 2 та гол урди ва 3 марта сариқ карточка олди.