Гарри Кейн Левандовски рекордини янгилаш ҳақида фикр билдирди
Мюнхеннинг «Бавария» клуби ҳужумчиси Гарри Кейн Бундеслиганинг шанба кунги «Вердер»га қарши баҳсида (3:0) икки бор гол урди. Англиялик форвард 22-дақиқада пенальтини аниқ ижро этди, 25-дақиқада эса ўйиндан гол киритди. Бу ҳақда euro-football.ru хабар беради.
32 ёшли футболчининг Германия чемпионатидаги жорий мавсумида ҳисобида 26 та гол бор, финишгача эса 12 тур қолди. Журналистлар ундан Роберт Левандовскининг Бундеслигадаги 41 голлик рекордини янгилаш имконияти ҳақида сўрашди.
«Ҳамма нарса бўлиши мумкин, аммо ҳозирча бу натижадан анча узоқдаман. Бу рекорд ақл бовар қилмас даражада. Ҳозир ўзимни яхши ҳис қилаяпман ва жамоага ёрдам бера олаётганимдан хурсандман. Апрелда қандай ҳолатда бўлишимни кўрамиз — шундан кейин рекорд ҳақида ўйлайман. Ҳозир эса кейинги ўйинга эътибор қаратиш керак», — дея Кейннинг сўзларини Bayern & Germany келтирди.
Қайд этилишича, «Вердер» дарвозасига урилган иккинчи гол Кейн учун профессионал фаолиятидаги 500-гол бўлди.