Юридик шахсларга дронлар энди расман рухсат бериладими?
2026 йилдан Ўзбекистонда корхоналар учун дронлар билан ишлаш анча “очиқ режим”га ўтиши кутилмоқда. 2026 давлат дастури бўйича қабул қилинган президент фармони доирасида фуқаро авиациясида учувчисиз учиш ускуналаридан фойдаланиш тартиби либераллаштирилади.
Энг катта ўзгариш — юридик шахсларга дронларни импорт қилиш, ишлаб чиқариш ва улардан фойдаланиш ҳуқуқи берилиши. Дронлар, эҳтиёт қисмлар, сотув ва сервис хизматлари ҳам тизимли йўлга қўйилади, лекин ҳаммаси лицензия ва сертификатлар асосида бўлади — яъни “олиб келдим, учирдим” эмас, қоидаси билан.
Хавфсизлик томони ҳам унутилмайди: мамлакат ҳаво ҳудуди “яшил”, “сариқ”, “қизил” зоналарга ажратилиб, қаерда ва қандай шароитда учириш мумкинлиги аниқ белгиланиши режалаштирилган. Парвозларни кузатиш ва назорат қилиш учун ягона автоматлаштирилган рақамли инфратузилма ҳам жорий этилади.
Шу билан бирга, дрон операторлари учун ўқитиш ва махсус гувоҳнома/лицензия бериш механизмлари йўлга қўйилади. Бу йўналишда Мудофаа, Транспорт ва Рақамли технологиялар вазирликлари ҳамда Стратегик ривожланиш ва ислоҳотлар агентлигига 2026 йил июнигача тегишли ҳужжат лойиҳасини ишлаб чиқиш вазифаси қўйилгани айтилади.