Лапорта Гави жароҳатдан кейин жуда қийналганини айтди
“Барселона” президенти Жоан Лапорта ярим ҳимоячи Гави олган жароҳат ҳақида фикр билдирди. 21 ёшли футболчи ўтган йил август ойида сафдан чиққан, жорий мавсумда эса атиги икки учрашувда майдонга тушишга улгурган. Бу ҳақда euro-football.ru хабар беради.
Гавининг тиззасидаги муаммо жарроҳлик амалиётини талаб қилган. Клуб унинг майдонга қайтишини март ойига режалаштирмоқда.
“Гави жароҳатдан кейин жуда қийналди. У йиғлади. У ўйнаш учун ҳамма нарсага тайёр эди, зарур бўлса, қўлтиқтаёқда ҳам майдонга чиқарди”, — дея Лапортанинг сўзларини келтиради Barca Universal.
Лапортага кўра, футболчи тикланиш жараёнида яхши олдинга силжимоқда. У оғир жароҳатлар бутун жамоа кайфиятига таъсир қилишини таъкидлар экан, шифокорлар, мураббийлар ва Гавининг оиласи биргаликда ишлаётгани тикланишни имкони қадар самарали қилишга хизмат қилаётганини қўшимча қилди.
“Барселона”нинг навбатдаги учрашуви якшанба куни бўлиб ўтади, рақиб — “Леванте”.