Мбаппе билан низо оқибатида ПСЖда яна ижрочи хавфи пайдо бўлди
Европа Чемпионлар лигаси ва Франция чемпионатининг амалдаги ғолиби “Пари Сен-Жермен” клуби Килиан Мбаппе билан боғлиқ суд тортишувида яна мажбурий ижро чораларига дуч келиши мумкин. Суд қарорларига кўра, клуб футболчи томонига 60 миллион евродан ортиқ маблағ тўлаши керак эди. Бироқ “Реал Мадрид” ҳужумчисининг вакиллари айтишича, шу сумма ичида ҳали ҳам 2 миллион евро етишмай турибди. Айни пайтда Мбаппенинг юридик жамоаси қолган маблағни мажбурий тарзда ундириш бўйича иш олиб бораётгани айтилмоқда.
ПСЖ ва Мбаппе ўртасидаги бу молиявий можаро 2025 йил декабрь ойидаги суд қарори ортидан янада чуқурлашган. Клуб қарзнинг катта қисмини қоплаган бўлса-да, айнан 2 миллион евролик “фарқ” сабаб футболчи томони яна қатъий позицияни ушлаб турибди. Хабарларга кўра, Мбаппенинг адвокатлари зарурат туғилса, суд ижрочиларини клубнинг маъмурий офисларига юбориш эҳтимолини ҳам четга сурмаяпти.
Низо Париж саноат суди қарори билан боғлиқ. Суд ПСЖни Мбаппега жами 60 миллион евро тўлашга мажбур қилган. Ушбу сумма тўланмаган маошлар, имзо бонуслари ва фоизларни ўз ичига олади. Дастлаб парижликлар 55 миллион еврони ўтказган, кейин ижро органлари аралашувидан сўнг яна 4 миллион евро қўшган. Аммо футболчи томонининг даъвосига кўра, якуний 2 миллион евро ҳали ҳам тўлиқ ёпилмаган.
Шу билан бирга, ПСЖ ўз мажбуриятларини тўлиқ бажарганини таъкидламоқда. Клуб позициясига кўра, баҳсли тафовут солиқлар ва ижтимоий суғурта бадаллари билан боғлиқ техник ҳисоб-китоблардан келиб чиққан.
Бу тортишув ПСЖ учун оддий ҳисоб-китобдан кўра кенгроқ маъно касб этяпти — жамоатчилик олдидаги обрў масаласига айланиб қолган. Айрим хабарларга кўра, клуб суд қарорининг тўлиқ матнини расмий сайти бош саҳифасида бир ой давомида эълон қилиш мажбуриятидан қочиш учун Мбаппе билан келишувга келмоқчи. Аммо футболчи томони на 2 миллион евродан, на эълон мажбуриятидан воз кечиш ниятида эмас.
Суд қарорининг молиявий тафсилотлари
Суд Мбаппенинг ойлик ялпи маошини 11,8 миллион евро деб белгилаган. Қарорда қуйидаги тўловлар кўрсатилган:
• 36,6 миллион евро — имзо бонусининг учинчи қисми;
• 3,6 миллион евро — таътил пули;
• 17,2 миллион евро — 2024 йил апрель, май ва июнь ойлари учун маош;
• 1,7 миллион евро — шу давр учун таътил пули;
• 1,5 миллион евро — “этика бонуси”;
• 150 минг евро — унга боғлиқ таътил тўлови;
• 5 минг евро — суд харажатлари.
Суд, шунингдек, ПСЖнинг “Мбаппе 2023 йилда таркибдан четлатилган пайтда бонуслардан ўз ихтиёри билан воз кечган” деган даъволарини рад этган. Бу эса футболчи фойдасига чиқарилган иккинчи мустақил қарор сифатида қайд этилаётгани айтилмоқда.
Қисқаси, ПСЖ бу ишни “техник масала” дейиши мумкин, аммо Мбаппе томони учун бу — принцип. Энди энг қизиқ нуқта: клуб қолган 2 миллионни қандай шаклда ёпади ва бу тортишув яна қай даражагача бориб етади.