Диего Коста «Атлетико»да қолса, Симеонени ўлдиришини айтган
Мадриднинг «Атлетико» клубида тўп сурган собиқ ҳужумчи Диего Коста жамоани тарк этиш ҳақида ўйлаган пайтларини эслаб берди. Унинг айтишича, юлдузга айланишидан олдин Симеоне билан муносабатлар жуда таранг бўлган. Бу ҳақда euro-football.ru хабар беради.
Костанинг сўзларига кўра, 2012 йилда Диего Симеоне уни асосий таркиб режаларига киритмаслигини билдирган. Футболчи эса мунтазам ўйнашни хоҳлашини айтиб, кетишга мажбур эканини таъкидлаган.
У ўша даврда «Челси»га қарши Европа Суперкубоги учрашувида (4:1) майдонга тушишга яқин бўлганини, аммо сўнгги алмашиниш пайтида Симеоне Фалкаони Эмрега алмаштириб, уни захирада қолдирганини айтди. Коста бу ҳолатни жуда оғир қабул қилганини яширмади.
Ҳужумчи кейин агенти Жорже Мендешга қўнғироқ қилиб, зудлик билан янги клуб топиб беришини сўраган ва ҳиссиётга берилиб, акс ҳолда Симеонени ўлдиришини айтган. Коста жароҳатдан кейин тикланиб, машғулотларда ишлаган бўлса-да, барибир майдонга туширилмагани трансфер ойнасининг сўнгги кунида уни кетиш ҳақидаги фикрга янада яқинлаштирганини қўшимча қилди.
Эслатиб ўтамиз, Диего Коста 2014 йилда «Челси»га кўчиб ўтган, тўрт йилдан кейин эса яна «Атлетико»га қайтган.