Слуцкий бошқарувидаги «Шанхай Шэньюа» Осиё Чемпионлар лигасида ютқазди
«Шанхай Шэньюа» Осиё Чемпионлар лигасининг етти туридан кейин плей-офф йўлланмаси учун имкониятларини бой берди. 8-турда «Бурирам Юнайтед»га қарши учрашув Леонид Слуцкий жамоаси учун мусобақани ижобий якунлаб, “эшикни қарсиллатиб ёпиш”га уриниш эди, бироқ бу режадан ҳеч нарса чиқмади. Бу ҳақда euro-football.ru хабар беради.
Ўйин 0:2 ҳисобида тайландликлар фойдасига якунланди. «Бурирам Юнайтед» биринчи бўлимнинг аввалидаёқ икки бор рақиб дарвозасини ишғол қилди. Орадан кўп ўтмай «Шанхай Шэньюа» бир футболчига кам бўлиб қолди ва бу ҳолат ўйин атрофидаги интрига деярли сўнишига олиб келди.
Қайд этилишича, Леонид Слуцкийнинг «Шанхай Шэньюа» билан амалдаги шартномаси 2027 йил охиригача мўлжалланган.