«Галатасарай» ва «Фенербахче» футболчиларини гаров иши бўйича қамоқ кутмоқда
Туркияда «Галатасарай» ва «Фенербахче» клублари вакили бўлган икки футболчи ставкалар билан боғлиқ иш юзасидан қамоқ жазоси хавфи остида қолмоқда. Бу ҳақда euro-football.ru хабар беради.
Гап «Галатасарай» футболчиси Метехан Балтаджи ҳамда «Фенербахче» сардори Мерт Ҳакан Яндаш ҳақида кетмоқда. Уларнинг биринчисига 13 йилгача, иккинчисига эса 17 йилгача озодликдан маҳрум этиш жазоси таҳдид солаётгани айтилмоқда.
Sabah нашри маълумотига кўра, Балтаджи камида икки марта «Галатасарай» иштирокидаги учрашувларга пул тиккан. У ўша ўйинларда асосий таркибда бўлмаган, бироқ қайдномага киритилгани сабаб натижага таъсир ўтказиш имкониятига эга бўлган деб баҳоланмоқда.
Амалдаги Туркия қонунчилигига кўра, футболчи букмейкерларга ўзининг профессионал спортчи эканини маълум қилиши шарт эди. Бироқ у буни бажармагани қайд этилмоқда.