Жезуш Роналдуга дам берди, у навбатдаги ўйинни ўтказиб юборади
"Ал-Наср" бош мураббийи Жорже Жезуш Криштиану Роналду нега яқинлашиб келаётган учрашувда майдонга тушмаслигини изоҳлаб берди. Бу ҳақда euro-football.ru хабар беради.
Ар-Риёд клуби чоршанба куни ОФК Чемпионлар лигаси доирасида "Аркадаг"га қарши баҳс олиб боради. Португалиялик юлдуз ҳужумчи бойкотдан сўнг тез орада қайтиши кутилганди, бироқ бу сафар ҳам у қайдномага киритилмайди.
Жезушнинг айтишича, тиқиз тақвим сабаб Роналду ва асосий таркибдаги яна бир қатор футболчиларга дам беришга қарор қилинган. Мураббий фикрича, жамоа олдинда "Ал-Фатеҳ"га қарши муҳим ўйинга тайёргарликни биринчи ўринга қўймоқда.
Шунингдек, Жезуш Роналдунинг Саудия Арабистонидан ташқарида ўтадиган учрашувларни ўтказиб юбориши янгилик эмаслигини, бу ҳолат аввал ҳам бир неча бор такрорланганини таъкидлади.
Саудия чемпионатидаги "Ал-Фатеҳ" — "Ал-Наср" учрашуви шанба, 14-февраль куни бўлиб ўтади.