"Барселона" бош мураббийи клубдан кетишга тайёрланмоқда
«Барселона» бош мураббийи Ханс-Дитер Фликнинг келажаги борасида кутилмаган хабарлар тарқалди. Журналист Флориан Плеттенбергнинг маълум қилишича, немис мутахассиси клуб президенти Жоан Лапорта лавозимини тарк этган тақдирда, ўзи ҳам жамоа билан хайрлашишга қарор қилиши мумкин. Флик ҳозирги раҳбарият билан ишлашдан мамнун ва келгусидаги стратегик режаларни айнан Лапорта билан бирга амалга оширмоқчи.
Маълум бўлишича, Флик Барселона шаҳри, клуб муҳити ва мухлисларга жуда боғланиб қолган. У шартномасини узайтиришдан манфаатдор, бироқ унинг қолиши 15 март куни бўлиб ўтадиган президентлик сайловлари натижаларига бевосита боғлиқ. Агар Лапорта қайта сайланмаса, мураббий ёзда ёки 2027 йилда шартномаси якунлангач, жамоани тарк этиш вариантини кўриб чиқмоқда.
Айни дамда Ханс-Дитер Флик қўл остидаги «Барселона» ажойиб спорт формасида. Испания чемпионатининг 26-туридан сўнг, каталонияликлар 64 очко билан турнир жадвалида яққол пешқадамлик қилмоқда. Жамоанинг муваффақиятли ўйинлари фонида юзага келган бу вазият мухлисларни хавотирга солиши табиий.