Apple M5 Max ва Snapdragon X2 Extreme куч синашмоқда

Технология оламида кутилган янги авлод процессорлари ўз имкониятларини намойиш этишни бошлади. Geekbench платформасида Apple M5 Max ҳамда Qualcomm Snapdragon X2 Extreme чипларининг дастлабки тест натижалари пайдо бўлди. Ҳар икки платформа ҳам ўз синфида юқори самарадорлик кўрсатиб, фойдаланувчилар ва экспертлар эътиборини тортди. Бу ҳақда rozetked.me хабар беради.

Хусусан, Apple компаниясининг янги M5 Max чипи график имкониятлар бўйича ўзидан олдинги M4 Max моделини ортда қолдирди. Metal график тестида M5 Max 219 мингдан 233 минг баллгача натижа қайд этган бўлса, M4 Max модели тахминан 190 минг балл тўплаган эди. Бу кўрсаткич Apple ўз чипларининг график унумдорлигини сезиларли даражада оширганидан далолат беради.

Snapdragon X2 Extreme платформаси ҳам рақобатдан қолишмаяпти. Qualcomm компанияси ушбу процессор орқали ноутбуклар бозорида ўз мавқеини янада мустаҳкамлашни мақсад қилган. Ҳозирча ҳар икки чипнинг якуний версиялари қандай ишлаши ва реал фойдаланиш жараёнида қайси бири устунлик қилиши қизиқиш уйғотмоқда. Мутахассислар ушбу икки гигант ўртасидаги пойга келгуси йилда компьютерлар бозоридаги рақобатни янги босқичга олиб чиқишини башорат қилмоқда.