Тошкент—Дубай рейслари қайта очилди: янги жадвал маълум
Uzbekistan Airways авиакомпанияси Тошкент—Дубай—Тошкент йўналишидаги мунтазам авиақатновларни қайта тиклашини расман эълон қилди. БАА авиация расмийларига таяниб маълум қилинишича, парвозлар 2026 йил 19 мартдан бошлаб яна йўлга қўйилади.
Маълумотларга кўра, аввал бекор қилинган рейслар йўловчилари учун қулайликлар яратилган. Жумладан, улар ўз авиачипталарини компаниянинг исталган кейинги рейсларига ҳеч қандай қўшимча тўловларсиз қайта расмийлаштириш имкониятига эга. Бу эса йўловчилар манфаатларини ҳимоя қилиш ва сафарларни осонлаштиришга қаратилган муҳим чоралардан бири ҳисобланади.
Янги жадвалга мувофиқ, рейслар қуйидаги тартибда амалга оширилади:
— ҲЙ333 рейси Тошкентдан соат 07:15 да учиб, Дубай шаҳрига 11:00 да етиб боради;
— ҲЙ334 рейси эса Дубайдан 12:30 да парвоз қилиб, Тошкентга 17:30 да қўнади.
Барча вақтлар маҳаллий вақт бўйича кўрсатилган.
Авиачипталарни Uzbekistan Airwaysнинг расмий веб-сайти, мобил иловаси, шунингдек, сотув филиаллари ва ваколатли агентликлар орқали харид қилиш мумкин. Парвозлар амалга оширилаётганда минтақадаги жорий вазият тўлиқ инобатга олиниб, хавфсизлик талаблари ва халқаро стандартларга қатъий риоя этилади.
Эслатиб ўтамиз, 10 мартдан бошлаб Ўзбекистондан Саудия Арабистони ва Бирлашган Араб Амирликларига амалга ошириладиган йўловчи рейсларига жорий этилган чекловлар бекор қилинган эди. Янги қарорга кўра, эндиликда йўловчиларнинг фуқаролиги ёки тоифасига доир чекловлар ҳам олиб ташланиб, икки томонлама авиақатновлар тўлиқ тикланди.
Шу билан бирга, умра мавсуми якунига етаётгани муносабати билан Саудия Арабистонига парвозлар учун айрим қўшимча талаблар жорий этилган. Қонунчиликка мувофиқ, зиёратчилар Ҳаж-2026 мавсуми бошланишидан аввал мамлакат ҳудудини тарк этиши шарт.
Мутахассислар фикрича, рейсларнинг қайта тикланиши нафақат сайёҳлик, балки бизнес ва шахсий сафарлар учун ҳам янги имкониятлар эшигини очади.