АҚШда миллионлаб одамлар Трампга қарши кўчага чиқди (видео)
Қўшма Штатлар бўйлаб “Қироллар йўқ” ("No Kings") шиори остида кенг кўламли оммавий норозилик акциялари бўлиб ўтди.
Маълумотларга кўра, мамлакатнинг қарийб 3200 та шаҳрида миллионлаб фуқаролар кўчаларга чиқиб, ҳозирги сиёсатга қарши ўз позицияларини намоён қилди. Намойишчилар асосан Доналд Трамп маъмурияти юритаётган сиёсатдан норози эканини билдирган.
Қатнашчилар турли шиорлар ва баннерлар орқали ўз талаб ва эътирозларини ифода этиб, давлат бошқарувида адолат ва очиқликни таъминлашга чақиришди. Айрим шаҳарларда намойишлар тинч руҳда ўтган бўлса, бошқа ҳудудларда хавфсизлик чоралари кучайтирилгани қайд этилди.
Кузатувчиларнинг фикрича, бундай оммавий чиқишлар АҚШ жамиятидаги сиёсий бўлинишлар чуқурлашаётганидан дарак беради. Шунингдек, бу каби норозилик акциялари мамлакат ички сиёсий муҳитига ҳам сезиларли таъсир кўрсатиши мумкин.