Арча районында ире ишек белән ялгыш бәргән хатын үлгән
Татарстанның Арча районында 52 яшьлек ир-атка карата суд эше төгәлләнде. Ир-ат үзе белән бергә яшәгән хатын-кыз үлемендә гаепле дип табылды. Хатын-кыз ызгыш вакытында ир-атның саксызлыгы аркасында үлгән. Бу хакта Татарстан прокуратурасына сылтама белән KazanFirst сайты яза.
Фаҗига 2025 елның 11 мартында шәхси йортта була. Ир-ат һәм хатын-кыз арасында бәхәс килеп чыга. Ызгышкан вакытта, ир-ат йокы бүлмәсенең ишеген бик каты этеп җибәрә, ә бу вакытта хатын-кыз шул ишек артында басып торган була. Ишек хатын-кызның битенә бәрелә, хатынның йөзе каный башлый.
Имгәнгән хатын юына да йокларга ята. Икенче көнне иртән ир-ат аны үле килеш таба. Суд-медицина экспертизасы раслаганча, нәкъ менә ишеккә бәрелеп имгәнү аның сәламәтлегенә авыр зыян салган һәм үлем сәбәбе булган.
Суд ир-атны «Саксызлык буенча кеше үтерү» маддәсе буенча гаепле дип тапты. Аның 1 елга иреген чикләгәннәр.