Төркиядә азат ителгән Екатерина ташлап калдырган баласын кире кайтарырга тели
Төркия аэропортында яңа туган баласын ташлап калдырган Россия кешесе Екатерина Б. Анталья суды карары белән азат ителгән. İHA агентлыгына белдергәнчә, ул баласын кире кайтарырга һәм аны Россиядә тәрбияләргә өметләнә. Бу хакта РИА Новости яза.
- Төркиядә 15 елга хөкем ителгән 18 яшьлек кызның сабые Антальяда балалар йортында кала, дип язган идек.
Антальяда аеруча авыр җинаять эшләре буенча суд Екатеринаны якын туганын үтерергә маташкан өчен февраль аенда 15 елга хөкем итте. Баланың әбисе Еленаны акладылар. Антальяның апелляция суды Екатеринаны азат итү турында карар чыгарды, дип хәбәр итә İHA агентлыгы.
Соңрак Екатерина аэропортта калдырып киткән кыз баланы Россиягә кайтардылар, дип хәбәр итте Россия Президенты каршындагы бала хокуклары буенча вәкаләтле вәкил Мария Львова-Белова.
«Мин бик тә кызымны алырга телим. Аны Россиядә үзем үстерәчәкмен», – дигән Екатерина. Бу турыда İHA агентлыгы яза.
«Мин бәдрәфтән чыктым һәм кызымны алырга теләдем. Әмма мине тотып алдылар һәм полиция участогына алып киттеләр», – дип сөйләгән Екатерина.