Казанның ике зур фестивале «Россиянең театр фестивальләре» басмасына керми калган
«Алтын битлек» театр премиясе һәм фестивале дирекциясе «Россиянең театр фестивальләре» мәгълүмати белешмәлек әзерләгән. Анда илнең 123 шәһәреннән 336 фестиваль турында мәгълүмат тупланган.
Ни гаҗәп - әлеге басмада Казанда 2009 елдан бирле даими үткәрелеп килүче «Һөнәр» бөтенроссия яшь режиссура фестивале һәм 2013 елдан бирле үткәрелүче «Шомбай-fest» халыкара курчак театрлары фестивале кермәгән. Исемлек Россия театр эшлеклеләре берлегенең телеграм-каналында чыкты.
Ни өчен болай килеп чыккан – «Интертат» бу сорауны ТР Театр эшлеклеләре берлеге рәисе Фәрит Бикчәнтәев исеменә юллады. Җавап көтәбез.
- «Шомбай-fest» Халыкара курчак театрлары фестивален оештыручыларның төп бурычларының берсе - тамашачыларга дөнья курчак сәнгатенең барлык төрләре белән танышу мөмкинлеге бирү. Фестиваль 3 елга бер тапкыр үткәрелә. Фестиваль үз мәйданында Франция, Төркия, Италия, Төркмәнстан, Ингушетия, Казахстан, Белоруссия, Әзербайҗан, Таҗикстан, Саха (Якутия), Башкортстан, Хакасия, Карелия һәм башка төбәкләрдән 40тан артык театрны җыйды. Спектакльләрне Россиянең күренекле театр эшлеклеләре кергән жюри әгъзалары бәяли.
- 2009 елда Камал театры инициативасы белән башлап җибәрелгән «Һөнәр» фестивален 2019 елдан башлап, Кариев театры оештыра. Әлеге фестивальне оештыручылардан Илфир Якупов һәм Нияз Игъламов Җәлил исемендәге республика премиясенә дә ия булдылар. 2024 елдан башлап фестиваль яңартылган концепция белән тәкъдим ителде. Фестиваль кысаларында яшь режиссерга Фәрит Хәбибуллин исемендәге премия тапшырыла.
Белешмәдә Казаннан түбәндәге фестивальләр күрсәтелгән:
- Шаляпин исемендәге халыкара опера фестивале;
- Рудольф Нуриев исемендәге классик балет фестивале (Нуриев фестивале);
- Качалов театр фестивале;
- Төрки халыкларның «Нәүрүз» халыкара театр-белем бирү фестиваль-форумы;
- «ПушкинФЕСТ» рус мәдәнияте фестивале.