Çĕнĕ вĕренӳ çулне хатĕр

Çĕнĕ вĕренÿ çулĕ умĕн республикăра социаллă пĕлтерĕшлĕ учрежденисен çывăхĕнчи çул каçмăшĕсене, светофорсене тĕрĕслеççĕ. Çак ĕç «Хăрушсăр çулсем» проектпа килĕшӳллĕн пулса пырать. Паян Чăваш Республикин Патшалăх Канашĕн, Шупашкар пухăвĕн депутачĕсем хулари хастар çынсемпе пĕрле Шупашкарти 40-мĕш тата 41-мĕш пĕлӳ çурчĕсене çитрĕç. Мĕнле çитменлĕхсем асăрхарĕç-ха? Малалла – тĕплĕнрех.

Çуран каçмалли çула Шупашкарти 40-мĕш шкул çывăхĕнче нумаях пулмасть çеç вырнаçтарнă. Унччен маларах ку тăрăхра пурăнакансем те, çак вĕренӳ учрежденине çӳрекенсем юнашар аллейăри каçмăшпа усă курнă. Малашне кунта хĕвел пайăркинчен вăй пухса ĕçлекен Т7 светофор вырнаçтарасси пирки те сăмах пуçарчĕç тĕрĕслекенсем. Шупашкарта ун пеккисем 11 çĕрте пур.

АЛИНА КРАСНОВА: «Ман ача кăçал çак шкулта вĕренет. Кĕçĕнни те каять çак шкула. Мана çакăнта светофор кирлĕ тесе шутлатăп эпĕ, мĕншĕн тесессĕн пур машинăсем те чармаççĕ. Хăвăрт иртсе каяççĕ. Кирлех пуль тетĕп светофор».

Унсăр пуçне ача-пăча йышлă каçса çӳрекен вырăнта йывăçсем чашкăрса кайни те вĕсене килĕшмерĕ. Шупашкар хула администрацине ку ыйтăва тимлĕх уйăрма хушрĕç. Общество хастарĕсем хулари 41-мĕш шкула та çитрĕç. Çитменлĕхсем çукпа пĕрех. Вĕрентӳ, социаллă пĕлтерĕшлĕ объектсен çывăхĕнче светофорсем, каçăсем тата ытти хăрушсăрлăх объекчĕсене вырнаçтарма 3 миллион тенкĕ уйăрнă.

ТАТЬЯНА ЕФИМОВА: «Светофор шкулсем патĕнче пулмалла. Машинсем питĕ нумай. Вĕсем вăхăтра чарăнса ларсан лайăх пулмалла, паллах». Выртакан полицейскисем хăвăртлăха чакарма пулăшаççĕ. 40 километртан иртме юрамасть. Çак хăрушсăрлăх йĕркисем ачасен пурнăçне упраса хăварасса шанать тӳре-шара. Регина Кубайкина, Юрий Марков