Услама — тĕрев
Чăваш Енре пурăнакан кашни 15-мĕш çын усламçă, хăйне ĕçпе тивĕçтерет е пĕчĕк бизнесра тăрăшать. Пĕчĕк тата вăтам усламра паянхи куна 43 000 ытла çын вăй хурать. Патшалăх вĕсене мĕнпе пулăшма пултарать? Кун пирки Чăваш Республикин экономика аталанăвĕн министрĕ Дмитрий Краснов тӳрĕ эфирта каласа кăтартрĕ.
Бизнес-план çырмалла, ăна хӳтĕлемелле, проект хакĕн 25 процентне хушмалла. Çакна пурнăçласан 26 çула çитмен усламçăсем патшалăх тĕревне илме пултараççĕ. Кăçал конкурса 22 ĕç килнĕ. Вĕсен хакĕ 15 миллиона яхăн. Предприятие аталантарма оборудовани туянсан вĕсен тăкакне те саплаштараççĕ. Ку тĕреве иртнĕ çултанпа кĕртнĕ. Ăна илме тĕрлĕ тавар кăларнă çĕртре ĕçлемелле тата налук тытăмĕнче регистрациленмелле. Хатĕр-хĕтĕрĕн 30 процентне каялла тавăрса параççĕ. Унăн 10 миллионран ытла пулмалла мар. Социаллă усламçăсем те тимлĕхре. Вĕсем «Манăн бизнес» центрта çăмăл мелпе укçа кивçен илееççĕ. Республикăра харпăр хăй тĕллĕн ĕçлекенсене тивĕçлĕ майсем туса парассипе те ĕçлеççĕ. Вĕсене пулăшма хыснаран ултă миллион та икçĕр пин тенкĕ уйăрнă