ნაციონალურ მოძრაობასთან დაახლოებული ორგანიზაციები ერთობიან და კვლევებს ატარებენ - თამაზ მეჭიაური
მმართველი გუნდის შეფასებით, NDI-ის კვლევის შედეგები საგანგაშო არ არის, რადგან ამ ორგანიზაციის მიერ ჩატარებული კვლევა ხშირად არ ასახავს რეალობას.
ამის შესახებ განცხადებებს მინისტრთა კაბინეტის წევრები და მმართველი გუნდის დეპუტატები გამოთქვამენ.
საფინანსო საბიუჯეტო კომიტეტის თავმჯდომარე, თამაზ მეჭიაური, ფიქრობს, რომ "ნაციონალურ მოძრაობასთან დაახლოებული NDI მსგავსი კვლევების ჩატარებით უბრალოდ ერთობა".
„ნაციონალურ მოძრაობასთან დაახლოებული სხვადსხვა ორგანიზაციები ატარებენ კვლევებს. აქედან გამომდინარე, ისინი რა დასკვნას დადებენ და რა პროცენტებს დადებენ გასაკვირი არ უნდა იყოს,“ - აცხადებს მეჭიაური.
სახელმწიფო მინისტრი შერიგებისა და სამოქალაქო თანასწორობის საკითხებში, პაატა ზაქარეიშვილი, კი ამბობს, რომ "ყველაზე რეალური კვლევა თავად არჩევნებია".
„რაც არ უნდა აჩვენოს დღეს ასეთმა კვლევებმა, არჩევნები მაინც ყველაზე უფრო მაღალი კვლევებია და ერთ წელიწადში ვნახავთ, ხალხი ქართულ ოცნებას რამდენად სერიოზულად ენდობა,“ - აცხადებს პაატა ზაქარეიშვილი.