გამოკითხულთა 60%-ს გადაწყვეტილება მიღებული არა აქვს - NDI-ის ხელმძღვანელი, ლორა ტორნტონი
"გამოკითხულთა 60%-ს გადაწყვეტილი არა აქვს თავისი პოლიტიკური სიმპათიები და პოლიტიკურმა პარტიებმა სწორედ ამ ამომრჩეველზე უნდა იმუშაონ," - ასე შეაფასა აშშ-ს ეროვნულ-დემოკრატიული ინსტიტუტის (NDI) საქართველოს ოფისის დირექტორმა, ლორა ტორნტონმა, კვლევის შედეგები, რომელიც ორგანიზაციამ დღეს გახადა საჯარო.
„რაც შეეხება პოლიტიკური პარტიების მხარდაჭერას, ყველაზე მთავარი მიგნება იყო ის, რომ საქართველოს მოსახლეობის უდიდეს ნაწილს არა აქვს გადაწყვეტილი თავისი პოლიტიკური სიმპათიები. მოსახლეობის თითქმის 60% ამბობს, რომ არ იცის, რომელ პარტიას მისცემდა ხმას ხვალ რომ საპარალამენტო არჩევნები ტარდებოდეს. რაც შეეხება მოსახლეობის იმ ნაწილს, რომელსაც აქვს ჩამოყალიბებული პოლიტიკური აზრი, ეს ადამიანები თანაბრად არიან გადანაწილებული ქართულ ოცნებასა და ერთიან ნაციონალურ მოძრაობას შორის 13-14%-ით.
"პარტიებმა მომავალი ერთი წლის განმავლობაში მაქსიმალურად უნდა შეეცადონ, რომ მომავალში თავის მხარეს გადაიბირონ გადაუწყვეტელი ამომრჩეველი და ამას უნდა მიაღწიონ მხოლოდ ეკონომიკასა და დასაქმებაზე საუბრით, რადგან ეს არის საკითხი, რომელიც მოსახლეობას მართლაც ყველაზე მერტად ადარდებს,“ - აცხადებს ლორა ტორნტონი.
NDI-ის კვლევის საველე სამუშაოები 8 აგვისტო-10 სექტემბრის პერიოდში ჩაატარა და საქართველოს მასშტაბით 4 500 პირი გამოკითხა.