«Кăвак çулăм» инкекĕнчен сыхланăр!
Унăн тĕсĕ те, шăрши те çук. Вăл пачах курăнмасть, çапах та хăрушă инкек кăларса тăратма пултарать. Сăмах газ сĕрĕмĕ çинчен. Хĕллехи тапхăрта ăшăтмалли хатĕрсемпе усă курнăран кăвак çулăм сиен кăтартнă тĕслĕхсен шучĕ йышланать. 11 уйăхра çеç республикăра газпа кил-çуртра асăрхануллă усă курманнипе 5 инкек пулнă. Вĕсенче 13 çын аптранă, 1 ача пурнăçран уйрăлнă. Çакншакал синкерлĕ лару-тăрăва лекнисен нушине ыттисен курмалла ан пултăр тесе газ тытăмĕнче тăрăшакансем массăллă информаци хатĕрĕсен ĕçченĕсемпе брифинг ирттерчĕç.
Вăхăт улшăнса пынă май çынсем хваттерсене те, уйрăм çуртсене те темиçе хутлă пластиклă чӳречесем, ăшă шайне çирĕп тытса тăракан алăксем лартаççĕ. Çавна май пурăнакан вырăна уçă сывлăш кирлĕ чухлĕ кĕртме йывăртарах. Çакă газ сĕрĕмĕ тухнă чухне уйрăмах пысăк инкек кăларса тăратма пултарать. Раштав уйăхĕн 12-мĕшĕнче, акă, Шупашкарти Карла Маркс урамĕнчи 46-мĕш çуртри хĕрарăмпа ачана больницăна илсе çитернĕ. Вĕсем газ сĕрĕмĕпе аптранă.
ЮЛИЯ АДЮКОВА: «Кĕтмен хăрушă инкек Кривов урамĕнче те пулса иртнĕ. Ун чухне газ сĕрĕмĕ тухнине пула 2 ача шар курнă, шел пулин те, 8 çулти арçын ачан пурнăçĕ вăхăтсăр татăлнă».
Çакнашкал тĕслĕхсем татах та пур. Çапах та, вĕсене пурне те пĕр çăмăл йĕркене пăхăннипе, кăвак çулăмпа усă курнă вăхăтра кантăка уçнипе татса пама пулнине палăртаççĕ специалистсем. Анчах та, çанталăк сивĕ тăнине кура чылайăшĕ çак мелтен пăрăнать. Кăвак çулăма туйса илме питĕ йывăр. Çавăнпа та инкек сиксе тухасран сыхă тăмалла. Газ тытăмне вăхăтра тĕрĕслеттермелли çинчен специалистсем асăрхаттарсах тăраççĕ. Апла пулсан та кил хуçисем хваттер алăкĕсене уçмаççĕ, çурта кĕме ирĕк памаççĕ. Çакă вара лару-тăрăва тата та çивĕчлетет. Газ тухнине туйсан 04, 104 е 112 номерсемпе шăнкăравламаллине те асра тытмалла. Хăвăра тата хăвăрăн çемьене «кăвак çулăм» инкекĕнчен сыхлас тесен газ приборĕсем юсавлă пулнине тĕрĕслеттерсех тăмалла.